सम्पुर्णमा नमस्कार!
प्रवासी भूमिमा दिगो र सहज जीवनस्तर बनाउन सहयोग गर्ने र सामाजिक क्षेत्रमा सेवा गर्ने चाहना अनुरूप गठन गरिएको एउटा संस्था हो उदयपुर सेवा समाज । उदयपुर जिल्लाको बिभिन्न भेगहरुबाट बिभिन्न पेशा व्यवसाय मार्फत दक्षिण कोरिया प्रवेश गर्नुहुने सम्पूर्ण उदयपुरेहरुको साझा समन्वय, सहकार्य र एकताको सानो समुह मार्फत सन् २०१७ मा विधिवत रुपमा स्थापना भएको हो । यस संस्थाले सुरुवाती दिनहरूमा बडो कष्टकर चरणहरू सँग सामना गर्दै सम्पूर्ण उदयपुरवासीलाई समेटेर एउटा गोलबद्ध बनाउन सफल भएको छ । संस्थाको स्थापनाको समय देखिनै कोरियाको बसाइ सहज पार्न सहजिकरण गर्दै विभिन्न कार्यक्रमहरू सञ्चालन गरि नेपालमा गरिब, विपन्न, असहाय व्यक्ति, समुदायहरूलाई राहत स्वरुप सहयोग गर्दै सामाजिक कार्य पनि गर्दै आईरहेको छ । विशेषगरी कोरियामा रहनुहुने सम्पूर्ण उदयपुरे हरूलाई कोरिया बसाइ अवधिभर आइपर्ने कुनैपनि समस्या, अप्ठ्याराहरूमाझ आवश्यक सहयोग जुटाउने र सहयोग गर्ने लक्ष्य रहेको छ । यस संस्थाको स्थापनाकाल पश्चात केही समय कोरोना महामारीको कारण र विभिन्न प्राविधिक समस्याको कारण संस्थाको आधिकारिक कामकाज साथै आवश्यक गतिविधिहरू आंशिक रुममा रोकिन गएता पनि अब पुनः नयाँ कार्यसमिति पुनर्गठन भई नयाँ जोस र जागर सहित सम्पूर्ण कार्यक्रमहरू र संस्थाको आधिकारिक गतिविधिहरू सञ्चालन भएको पनि जानकारी गराउन चाहन्छु । बिभिन्न पेशा र व्यवसाय मार्फत कोरिया रहनुहुने सम्पूर्ण उदयपुरे जिल्लावासी हरूलाई हामी सबैको साझा संस्थामा जोडिएर एकअर्काको दुख, सुखहरु आदान प्रदान गर्दै एकआपसमा आइपर्ने समस्याहरू मिलेर समाधान गर्न र कोरिया बसाइ अवधिभर सहज वातावरण निर्माण गर्न तपाई हामी सम्पूर्णको दायित्व र जिम्मेवारी हो तसर्थ तपाई सम्पूर्णमा हार्दिक अनुरोध पनि गर्न चाहन्छु । यस संस्थाको स्थापना समय देखि अहिले सम्म निरन्तर आफ्नो समय खर्चेर संस्थालाई बचाइरहन हरपल साथ र सहयोग गर्नुहुने संस्थापक समिति, वर्तमान कार्यसमिति, संरक्षक, सल्लाहकार साथै सम्पूर्ण उदयपुरेहरु प्रति हार्दिक आभार व्यक्त गर्न चाहन्छु । साथै आगामी दिनहरूमा अझ संस्थालाई मजबुत बनाई अगाडि लान तपाईँहरूको साथ सहयोगको भरपुर अपेक्षा राख्दछु ।
धन्यबाद ।